Кинигэҕэ ааптар – оҕо суруйааччыта, тыл билимин хандьыдаата, суруналыыс, СӨ үөрэҕэриитин уонна ыччат бэлиитикэтин туйгуна, СӨ суруйааччыларын Сойууһун чилиэнэ Ангелина Кузьмина – Үнүгэс сиэнэ оҕо саас мүччүргэннээх түгэннэрин туһунан көрдөөх кэпсээннэрэ киирдилэр.

Кэпсээннэр үтүө быһыыга, саха үгэһигэр, өйүн-санаатын барҕа баайыгар үөрэтэллэр, таарыйа туох, хайдах баар буолбутун судургутук өйдөнөр тылларынан билии аптаах-алыптаах дойдутугар сирдииллэр.

Кинигэ биһирэмигэр СӨ норуодунай поэта Иван Мигалкин, СӨ культуратын үтүөлээх үлэһитэ , поэт Николай Калитин, СӨ үөрэҕириитин туйгуна Татьяна Винокурова – Сабыйа, Таатта улууһун, Ытык-Күөл нэһилиэгин "Кустук" оҕо көрдөрүүлээх драматическай театрын салайааччыта Татьяна Захарова уонна СӨ культуратын туйгуна, Олоҥхо театрын артыыската Василина Баланова кыттыыны ыллылар.

Тэрээһини С. Ф. Гоголев аатынан Дьокуускайдааҕы педагогическай колледж алын сүһүөх оскуолатын 4 кылааһын үөрэнээччилэрэ уонна Василина Баланова айымньылары уустаан – ураннаан ааҕан киэргэттилэр.