Быйыл Саха сирин олохтоохторо үөрэх-билии үктэлин дабайалларыгар төһүү күүс буолбут, үйэ тухары сырдыгы сахпыт, бэйэтэ туспа суоллаах-иистээх, үтүө үгэстэрдээх Саха Өрөспүүбүлүкэтин национальнай бибилэтиэкэтэ, дьон-сэргэ таптаан ааттыырынан “Пушкинка” 100 сыллаах өрөгөйдөөх үбүлүөйүн бэлиэтиир. Үбүлүөйүнэн сибээстээн СӨ Национальнай бибилэтиэкэтигэр айымньылаахтык, ылыммыт дьыалаларыгар бэриниилээхтик үлэлээбит, үлэлии-хамсыы сылдьар Мэҥэ Хаҥаластан төрүттээх биир дойдулаахтарбытын бэлиэтиир хайаан да тоҕоостоох.
Гуляева Евдокия Павловна (10.10. 1930 – 03.07. 2019)
II Нөөрүктээйи нэһилиэгиттэн төрүттээх. Саха Өрөспүүбүлүкэтин култууратын үтүөлээх үлэһитэ, ССРС култууратын туйгуна. “Гражданскай килбиэн” анал бэлиэ туһааннааҕа. Историческай наука кандидата. В.М. Молотов аатынан Москватааҕы судаарыстыбаннай библиотечнай үнүстүтүүтү бүтэрбитэ. 1960 с. А.С. Пушкин аатынан өрөспүүбүлүкэтээҕи бибилэтиэкэҕэ үлэтин методиһынан, библиограбынан саҕалаабыта. 1991-2018 сс. НБ кинигэ пааматынньыктарын научнай-чинчийэр киинигэр научнай сотруднигынан, 2000 сыллаахтан Арктикатааҕы судаарыстыбаннай култуура уонна искусство үнүстүтүүтүн преподавателинэн үлэлээбитэ. 2004 с. «История книги в Якутии (1812-1917)” тиэмэнэн диссертациятын көмүскээбитэ. Саха сиригэр национальнай кинигэ дьыалатын историятын оҥорон бэлэмнээһиҥҥэ, книговедение сайдыытыгар сыаната биллибэт уһулуччулаах кылаатын киллэрбитэ. «Якутская книга (1812-1916)» монография уонна 30 научнай ыстатыйа ааптара.
Максимова Елизавета Гаврильевна (22.03.1932 -2013)
Дьаҥхаады нэһилиэгиттэн төрүттээх. ССРС култууратын туйгуна, ССРС култууратын министиэристибэтин “Туйгун үлэтин иһин” анал бэлиэ туһааннааҕа. Ленинградтааҕы судаарыстыбаннай култуура үнүстүтүүтүн бүтэрбитэ. Саха сиригэр бастакы үрдүк үөрэхтээх библиограф. А.С. Пушкин аатынан өрөспүүбүлүкэтээҕи бибилэтиэкэҕэ 1962-1963 сс. – ыстаарсай библиограф. 1963-1990 сс – библиография отделын салайааччыта. Уһулуччулаах библиограф, кыраайы үөрэтээччи Н.Н. Грибановскай нэһилиэстибэтин бэрээдэктээһиҥҥэ уонна бэчээккэ бэлэмнээһиҥҥэ сүҥкэн кылаатын киллэрбит киһинэн буолар.
Яковлев Михаил Николаевич (1934 -2000)
Хаптаҕай нэһилиэгиттэн төрүттээх. СӨ култууратын үтүөлээх үлэһитэ. “Килбиэннээх үлэтин иһин” мэтээл хаһаайына. Үлэ бэтэрээнэ. Илин Сибиирдээҕи судаарыстыбаннай култуура үнүстүтүүтүн үөрэнэн бүтэрбитэ. Өрөспүүбүлүкэҕэ кииннэммит бибилэтиэкэ ситимин олохтооһуҥҥа сүҥкэн кылаатын киллэрбитэ. 1985– 2000 сс. Дьокуускайдааҕы кииннэммит бибилэтиэкэ ситимин сатабыллаахтык салайбыт, 1973-1986 сс. научнай-методическай отдел сэбиэдиссэйинэн үлэлээбит, элбэх көлүөнэ исписэлиистэри уһуйбут күүстээх бибилэтиэкэринэн, методиһынан, дириэктэринэн биллэр. Кини быһаччы туруорсуутунан «Бизнес-библиотека», «Книга-03», «Библиотека семейного чтения» арыллан үлэлээбиттэрэ.
Гребенникова Надежда Константиновна
Нуораҕана нэһилиэгиттэн төрүттээх. СӨ култууратын туйгуна. Илин Сибиирдээҕи судаарыстыбаннай култуура үнүстүтүүтүн үөрэнэн бүтэрбитэ. 1980 с. А.С. Пушкин аатынан өрөспүүбүлүкэтээҕи бибилэтиэкэҕэ техническэй литература отделын бибилэтиэкэринэн үлэтин саҕалаабыта. Библиограф быһыытынан “Подземная разработка россыпных месторождений” (1989, 2002 сс.) библиографическай таһаарыылар, “Библиотеки – производству” (1989с) методическай босуобуйа бэчээттэнэн тахсыыларыгар үлэлэспитэ.
Ефимова Акулина Константиновна
II Наахара нэһилиэгиттэн төрүттээх. ССРС култууратын туйгуна, “Гражданскай килбиэн” анал бэлиэ туһааннааҕа. 1973-2020 сс. А.С. Пушкин аатынан өрөспүүбүлүкэтээҕи бибилэтиэкэҕэ учуот секторыгар, кинигэ хранилищетыгар, фонданы комплектыыр отделларга бибилэтиэкэринэн үтүө суобастаахтык үлэлээбитэ.
Местникова Галина Ильинична
Чалҕаа нэһилиэгиттэн төрүттээх. ССРС култууратын туйгуна. ССРС култууратын министиэристибэтин “Туйгун үлэтин иһин” анал бэлиэ туһааннааҕа. Үлэ бэтэрээнэ. Москватааҕы судаарыстыбаннай култуура үнүстүтүүтүн бүтэрбитэ. 1974 с. А.С. Пушкин аатынан өрөспүүбүлүкэтээҕи бибилэтиэкэҕэ култуурунай –маассабай үлэни тэрийиигэ кылаабынай бибилэтиэкэринэн үлэтин саҕалаабыта. 1979 с. периодика отделын сэбиэдиссэйинэн анаммыта. Кини салалтатынан ураты суолталаах уонна дэҥҥэ көстөр докумуоннары харыстааһыҥҥа, региональнай периодиканы, култуурунай нэһилиэстибэни сөпкө харайыыга киэҥ далааһыннаах үлэ ыытыллыбыта.
Павлова Татьяна Петровна
Алтан нэһилиэгиттэн төрүттээх. Саха Өрөспүүбүлүкэтин култууратын үтүөлээх үлэһитэ, ССРС култууратын министиэристибэтин “Туйгун үлэтин иһин” анал бэлиэ туһааннааҕа, НБ Бочуотун кинигэтигэр киллэриллибитэ. Москватааҕы судаарыстыбаннай култуура үнүстүтүүтүн библиотекарь-библиограф идэлээх бүтэрбитэ. Национальнай бибилэтиэкэҕэ 1977-1991 сс. научнай-методическай отделга ыстаарсай, сүрүннүүр, кылаабынай бибилэтиэкэринэн, методиһынан таһаарыылаахтык үлэлээбитэ. 1991 с. фонданы комплектыыр отделга сэбиэдиссэйинэн ананан 20 сыл устата үтүө суобастаахтык үлэлээбитэ. 2021 с информационнай ресурсаларынан хааччыйар Киин информационнай менеджмент сулууспатын сүрүннүүр библиограбынан үлэлии сылдьан бочуоттаах сынньалаҥҥа барбыта. 
Сосина Октябрина Иннокентьевна
Суола Моорук нэһилиэгиттэн төрүттээх. СӨ култууратын туйгуна, НБ Бочуотун кинигэтигэр киллэриллибитэ. Хабаровскайдааҕы судаарыстыбаннай култуура үнүстүтүүтүн үөрэнэн бүтэрбитэ. 1991 с. Национальнай бибилэтиэкэ научнай-методическай отделыгар сүрүннүүр методиһынан, 2002-2012 сс. отдел сэбиэдиссэйинэн үлэлээбитэ. Бэйэни салайыныы олоххо киирэр кэмнэригэр улуустар кииннэмит бибилэтиэкэлэрин ситимнэрэ юридическай сирэй буолалларыгар кини салайар методическай отдела улахан көмө үлэни ыыппыта. Өрөспүүбүлүкэтээҕи тус сыаллаах бырагырааманан «Сельская библиотека- центр информации для населения” диэн өрөспүүбүлүкэтээҕи куонкурска кыттан 80 бибилэтиэкэ компьютернай техника ылбыттара. Өрөспүүбүлүкэҕэ тыа сиригэр бастакы модельнай бибилэтиэкэлэр аһыллыбыттара, ол иһигэр 3 федеральнай модельнай бибилэтиэкэ.
Шишигина Марианна Николаевна
II Наахара нэһилиэгиттэн төрүттээх. СӨ култууратын туйгуна, «Физическэй култуура уонна спорт сайдыытыгар үтүөтүн иһин” СӨ Бочуотунай бэлиэ хаһаайына, РСФСР спордун бэтэрээнэ. Үлэ бэтэрээнэ. Дьокуускайдааҕы култуурунай- сырдатар училище библиотечнай салаатын үөрэнэн бүтэрбитэ. 1996 сылтан СӨ Национальнай бибилэтиэкэтигэр фонданы комплектыыр салааҕа үлэтин саҕалаабыта. Бу салаа өрөспүүбүлүкэ бары бибилэтиэкэлэрин, олохтоох ааптардар уонна Арассыыйа киин кинигэ оҥорооччуларын кинигэлэринэн тиһигин быспакка хааччыйаллара. 1997 с. фонданы комплектыыр салаа “Мир Знаний” тэрилтэни кытта холбоһон кинигэ маҕаһыына арыллыбыта, үлэ тэтимэ өссө күүһүрбүтэ.
Яковлева Татьяна Семеновна
2-с Мэлдьэхси нэһилиэгиттэн төрүттээх. СӨ култууратын туйгуна. Үлэ бэтэрээнэ. Москватааҕы судаарыстыбаннай култуура үнүстүтүүтүн үөрэнэн бүтэрбитэ. 1971 с А.С. Пушкин аатынан өрөспүүбүлүкэтээҕи бибилэтиэкэҕэ ааҕар саала бибилэтиэкэринэн үлэтин саҕалаабыта. СӨ Национальнай бибилэтиэкэтин справочнай библиографическай аппаратын биир тутаах элеменин – традиционнай каталогтар сайдыыларыгар сүҥкэн кылаатын киллэрбитэ.
Зыкова Розанна Афанасьевна
Тараҕай нэһилиэгиттэн төрүттээх. Арктикатааҕы судаарыстыбаннай култуура уонна ускуустуба үнүстүтүүтүгэр үөрэнэ сылдьар. 2023 с. Национальнай бибилэтиэкэ Оҕо ааҕар, арыллар киинигэр култуура уонна үөрэх отделыгар бибилэтиэкэринэн үлэлиир. Эдэр кэскиллээх ырыаһыт, ырыа айааччы. “Литературнай гастроклуб”, “КиноЛайк”, “Библиопродленка” бырайыактары айымньылаахтык үлэлэтэр. Өрөспүүбүлүкэтээҕи дьиэ кэргэн патриотическай бэстибээлин тэрийээччилэриттэн биирдэстэрэ.
Иванова Айталина Семеновна
Майа сэлиэнньэтиттэн төрүттээх. СӨ култууратын туйгуна. Арктикатааҕы судаарыстыбаннай култуура уонна ускуустуба үнүстүтүүтүн бүтэрбитэ. 2010 с. СӨ Национальнай бибилэтиэкэтин кинигэ пааматынньыктарын научнай-чинчийэр киинигэр үлэлиир. Киин икки бөдөҥ бырайыагар – «Сводный каталог якутской книги» уонна «Русская книга до 1917 г. в фондах НБ РС(Я)» кыттыыны ылбыта. «Каталог русской книги гражданской печати (1742-1830 гг.) из фондов НБ РС(Я)» диэн кинигэтэ «Сыл бастыҥ профессиональнай кинигэтэ — 2022» Арассыыйатааҕы куонкуруска «Идэлээххэ көмөлөһүү» анал ааты ылан Дипломунан наҕараадаламмыта.
Иванова Анна Николаевна
Нөөрүктээйи нэһилиэгиттэн төрүттээх. СӨ култууратын туйгуна, “Гражданскай килбиэн” анал бэлиэ туһааннааҕа, НБ Бочуотун кинигэтигэр киллэриллибитэ, 2019 с. “Үлэ киһитэ-2018” анал ааты ылбыта. Үлэ бэтэрээнэ. Улан-Удэтээҕи култуура үнүстүтүүтүгэр үөрэнэн «библиотекарь-библиограф» идэтин баһылаабыта. Кини уһун кэмҥэ ааҕааччылары хааччыйар отделга үлэлээбитэ. Билигин Галущак Айталина Петровна сэбиэдиссэйдээх хаһыат уонна сурунаал хараллар отделыгар үлэлии сылдьар. 2019 с. ааҕааччыга табыгастаах буоллун диэн «Подари газетам новую жизнь» бырагыраама ылыллан өрөспүүбүлүкэ хаһыаттарын сылын аайы былааннаан электроннай версияҕа бэлэмнээн оҥоттороллор.
Иванова Любовь Сергеевна
Майа сэлиэнньэтиттэн төрүттээх. 2015 с. Арктикатааҕы судаарыстыбаннай култуура уонна ускуустуба үнүстүтүүтүн бүтэрбитэ. 2017 с. Национальнай библиотека Оҕо уонна ыччат киинин информационнай, библиотечнай бырассыаһы автоматизациялыыр отделыгар сүрүннүүр технологынан үлэлии киирбитэ. Билигин Оҕо цифровой эйгэтин отделыгар НБ Оҕо арыллар, ааҕар киинин сайтын уонна НБ электроннай библиотекатын “Оскуола”, “Төрүөхпүтүттэн ааҕабыт” сегменнэрин эппиэтинэстээх исписэлииһинэн таһаарыылаахтык үлэлии сылдьар.
Ильина Галина Власьевна
Хара нэһилиэгиттэн төрүттээх. СӨ култууратын туйгуна. Илин Сибиирдээҕи судаарыстыбаннай култуура уонна искусство үнүстүтүүтүн бүтэрбитэ. 2000 с. СӨ Национальнай бибилэтиэкэтин оҕо уонна ыччат киинин кылаабынай бибилэтиэкэринэн үлэтин саҕалаабыта. 2004 с. «Восхождение по ступенькам права» тус бырайыагынан Бүтүн Арассыыйатааҕы пуорум Гранын ылары ситиспитэ. Билигин Оҕо ааҕар, арыллар киинин библиотечнай-информационнай өҥөнү оҥорор комплекснай киин сүрүннүүр бибилэтиэкэринэн айымньылаахтык үлэлиир.
Кларова Сайыына Борисовна
Алтан нэһилиэгиттэн төрүттээх. М. К. Аммосов аатынан ХИФУ хотугулууилиҥҥи норуоттар тылларын уонна култуураларын үнүстүтүүтүн магистратуратын бүтэрэн лингвист идэтин баһылаабыта. Үлэтин СӨ Национальнай бибилэтиэкэтин пресс-сулууспатыгар саҕалаабыта. Билигин Национальнай бибилэтиэкэ Медиакиинигэр айымньылаахтык үлэлиир.
Кривогорницын Иван Юрьевич
I Мэлдьэхси нэһилиэгиттэн төрүттээх. Илин Сибиирдээҕи судаарыстыбаннай култуура уонна искусство академиятын үөрэнэн бүтэрбитэ. Арассыыйа суруналыыстарын Сойууһун чилиэнэ, Арассыыйа кинематографистарын Сойууһун чилиэнэ, Арассыыйа кинематографистарын Сойууһун саха салаатын бырабылыанньатын бэрэссэдээтэлин солбуйааччы. Суруналыыстыка салаатыгар В.В. Никифоров-Күлүмнүүр аатынан Судаарыстыбаннай бириэмийэ лауреата. Национальнай бибилэтиэкэ Медиакиинигэр кылаабынай режиссерунан үлэлиир. 2018 с. биир дойдулаахпыт туһунан уһулбут “Ганнибал” киинэтэ “Золотой Орел-2018” Национальнай киинэ бириэмийэтин “Лучший неигровой фильм” анал аатын ылбыта.
Кычкина Лариса Иннокентьевна
Матта нэһилиэгиттэн төрүттээх. СӨ култууратын туйгуна. НБ Бочуотун кинигэтигэр киллэриллибитэ. Илин Сибиирдээҕи судаарыстыбаннай култуура уонна искусство үнүстүтүүтүн бүтэрбитэ. 2019 с. М.К. Аммосов аатынан ХИФУ саха салаатын магистратуратын үөрэнэн бүтэрбитэ. 1994 сыллаахтан кыраайы үөрэтэр отделга күн бүгүҥҥэ диэри харыс да сири халбарыйбакка таһаарыылаахтык үлэлиир. 2017 сыллаахтан бу отдел сэбиэдиссэйэ. Кыраайы үөрэтэр отдел өрөспүүбүлүкэҕэ улахан хабааннаах бырайыактары үлэлэтэр. Сахалыы уонна хотугу аҕыйах ахсааннаах норуоттар тылларынан лекторийдар, араас тэрээһиннэр тиһигин быспакка ыытыллаллар.
Лукина Галина Ивановна
I Тыыллыма нэһилиэгиттэн төрүттээх. СӨ култууратын туйгуна. Үлэ бэтэрээнэ. Илин Сибиирдээҕи судаарыстыбаннай култуура үнүстүтүүтүн үөрэнэн бүтэрбитэ. 1987 с. А.С. Пушкин аатынан өрөспүүбүлүкэтээҕи бибилэтиэкэҕэ ааҕааччыны кытары үлэлиир отделга бибилэтиэкэринэн үлэтин саҕалаабыта. 2021 с. информационнай-библиографическай отдел сэбиэдиссэйинэн ананан айымньылаахтык үлэлиир. Отдел научнай-библиографическай үлэҕэ сүҥкэн кылаатын киллэрэр. 1996 с. тахсар «Текущее законодательство РС (Я)», 2008 с. тахсыбыт «Законодательство РС (Я)» (1990 – 2002 сс..) хомуйан оҥорбут судаарыстыбаннай библиографическай ыйынньыктара күн бүгүҥҥэ диэри өрөспүүбүлүкэҕэ официальнай докумуоннарга төрүт ыйынньыгынан буолаллар. 2022 сылтан саҕалаан «Здравоохранение. Медицинские учреждения в Якутии (1932–2022 гг.)» ыйынньыкка үлэни салайар. Бу үлэ бөдөҥ библиограф, кыраайы үөрэтээччи Н.Н.Грибановскай “Библиография Якутии” фундаментальнай үлэтин салҕааһына буолар. 2023 с. Арассыыйа Национальнай бибилэтиэкэтин «Международный сводный каталог русской книги 1918–1926 гг.» бырайыакка кыттан таһаарыылаахтык үлэлэһэ сылдьар.
Мярикянова Александра Афанасьевна
Бүтэйдээх нэһилиэгиттэн төрүттээх. ССРС култууратын туйгуна. Илин Сибиирдээҕи судаарыстыбаннай култуура үнүстүтүүтүн үөрэнэн бүтэрбитэ.1966 с. Национальнай бибилэтиэкэҕэ научнай методическай салаа ыстаарсай бибилэтиэкэринэн үлэтин саҕалаабыта. Тыа хаһаайыстыбатын үлэһиттэрин хааччыйар отдел сэбиэдиссэйинэн, научнай-методическай отдел кылаабынай бибилэтиэкэринэн үлэлээбитэ. Кини көҕүлээһининэн өрөспүүбүлүкэ 15 оройуонугар тыа хаһаайыстыбатын үлэһиттэригэр анаммыт сектордар үлэлэрин саҕалаабыттара. Бибилэтиэкэ эйгэтигэр “Булгуччулаах экземпляр” диэн сокуон олоххо киириитигэр сыаната биллибэт кылааттаах. Күн бүгүн Уһук Илин, Сибиир уонна хотугу аҕыйах ахсааннаах норуоттар СӨ докумуоннарын ресурсаларын регионнар икки ардыларынааҕы киинин национальнай уонна кыраайы үөрэтэр фондатын салаатыгар үтүө суобастаахтык үлэлиир.
Никитина Евдокия Иннокентьевна
Нөөрүктээйи нэһилиэгиттэн төрүттээх. СӨ култууратын туйгуна. Илин Сибиирдээҕи судаарыстыбаннай култуура уонна искусство үнүстүтүүтүн бүтэрбитэ. 1997 с. национальнай уонна кыраайы үөрэтэр отдел библиограбынан үлэтин саҕалаабыта. 2019 с. информационнай ресурсаларынан хааччыйар киин фондатын комплектыыр отдел кылаабынай бибилэтиэкэринэн ситиһиилээхтик үлэлиир.
Николаева Саргылана Руслановна
Ороссолуода нэһилиэгиттэн төрүттээх. 2016 с. Арктикатааҕы судаарыстыбаннай култуура уонна ускуустуба үнүстүтүүтүн бүтэрээт төрөөбүт улууһугар Майатааҕы М.И. Брызгалова аатынан оҕо бибилэтиэкэтигэр сүрүннүүр бибилэтиэкэринэн үлэлии киирбитэ. 2023 с. СӨ Национальнай бибилэтиэкэтигэр үлэтин сэдэх кинигэлэри үөрэтэр- чинчийэр киин научнай үлэһитинэн саҕалаабыта. Билигин региональнай библиография салаатыгар библиограбынан таһаарыылаахтык үлэлии-хамсыы сылдьар.
Петрова Марина Иннокентьевна
Хара нэһилиэгиттэн төрүттээх. Арктикатааҕы судаарыстыбаннай култуура уонна искусство үнүстүтүүтүн магистратуратыгар үөрэнэр. 2023 сылтан Национальнай бибилэтиэкэ каталогизация ресурсаларын салаатыгар үлэлиир. Хаһыат, сурунаал ыстатыйаларын каталогизациялыыр. Ону таһынан «Библиослед» диэн рубрикага дайджестары бэчээттээн бибилэтиэкэ сайтыгар таһаарар.
Петров Прокопий Дмитриевич
Тараҕай нэһилиэгиттэн төрүттээх. СӨ Наукаларын Академиятыгар бибилэтиэкэ информационнай систиэмэлэригэр квалификацияны үрдэтии кууруһун бүтэрбитэ. 2020-2022 сс. Национальнай бибилэтиэкэҕэ дириэктэри хаһаайыстыбаннай чааска уонна хапытаалынай өрөмүөҥҥэ солбуйааччынан үлэлээбитэ. 2022 с. саҥа аһыллыбыт цифровизация киинигэр оцифровка лабораториятыгар сэбиэдиссэйинэн анаммыта. 2024 с. антитеррор уонна баһаарынай өттүгэр куттал суох буолуутугар эппиэттиир кылаабынай бибилэтиэкэринэн таһаарыылаахтык үлэлиир.
Рожина Ирина Гаврильевна
Ийэтинэн Төҥүлү нэһилиэгиттэн төрүттээх. Саха Өрөспүүбүлүкэтин култууратын туйгуна. Майа орто оскуолатын 1984 сыллаахха бүтэрбитэ. Илин Сибиирдээҕи судаарыстыбаннай култуура уонна искусство үнүстүтүүтүн бүтэрэн СӨ Национальнай бибилэтиэкэтигэр библиография отделыгар сүрүн библиограбынан үлэтин саҕалаабыта. 2021 сылтан интегрированнай информационнай ресурсалары үөскэтэр киин ресурстары каталогизациялыыр отделыгар сүрүн библиограбынан таһаарыылаахтык үлэлиир.
Сивцева Татьяна Николаевна
II Наахара нэһилиэгиттэн төрүттээх. СӨ култууратын туйгуна, «Саха сирин култууратын үлэһиттэрин профсойууһун сайыннарыыга кылаатын иһин» бэлиэ хаһаайына. Үлэ бэтэрээнэ. Арктикатааҕы судаарыстыбаннай култуура уонна искусство институтун квалификацияны үрдэтии кууруһун үөрэнэн бүтэрбитэ. Оҕо уонна ыччат киинигэр 2001 с. үлэтин ааҕар саала бибилэтиэкэринэн саҕалаабыта. 2017 с. электроннай оҕо бибилэтиэкэтин секторыгар, 2020 с. оҕо цифровой эйгэтин салаатыгар кылаабынай бибилэтиэкэринэн үлэлиир. Ол иһинэн талааннаах оҕолору өйүүргэ, сайыннарарга аналлаах «Ааптар оҕолор» бырайыагы ситиһиилээхтик үлэлэтэр.
Скрябина Сардана Васильевна
Мэҥэ Хаҥалас Хорообутуттан уонна Төҥүлүтүттэн төрүттээх. Саха Өрөспүүбүлүкэтин култууратын туйгуна. 2025 с. СӨ Ил Түмэнин Судаарыстыбаннай мунньаҕын Бочуотунай грамотатынан наҕараадаламмыта. Илин Сибиирдээҕи судаарыстыбаннай култуура уонна искусство үнүстүтүүтүн бүтэрбитэ. 1994 с. СӨ Национальнай бибилэтиэкэтигэр ааҕар саала гуманитарнай секторын сүрүннүүр бибилэтиэкэринэн үлэтин саҕалаабыта. 2020 с. национальнай библиография Киинигэр сүрүннүүр библиограбынан ситиһиилээхтик үлэлиир.
Өрөспүүбүлүкэҕэ библиотечнай дьыала сайдыытыгар Мэҥэ Хаҥалас улууһуттан төрүттээх биир идэлээхтэрбит сүҥкэн кылааттарын киллэрэн үлэлээбиттэрин, үлэлии-хамсыы сылдьалларын киэн тутта, холобур оҥосто ааттыыбыт.
Матырыйаалы бэлэмнээтилэр:
Ольга Дьяконова, Майатааҕы М.И. Брызгалова аатынан оҕо бибилэтиэкэтин сэбиэдиссэйэ,
Наталья Басова, Мэҥэ Хаҥаластааҕы кииннэммит бибилэтиэкэ ситимин тэрийэр-методическай киинин сэбиэдиссэйэ