Быйыл сааскыттан куйаар ситиминэн 5-с төгүлүн ыытыллар  “Кэрэкэ тыллар” Өрөспүүбүлүкэтээҕи күрэс, народнай поэт Рафаэль Дмитриевич Ермолаев-Баҕатаайыскай төрөөбүтэ 90 сылыгар аналлаах. Поэт, прозаик, Платон Ойуунускай аатынан Государственнай премия лауреата Рафаэль Баҕатаайыскай хоһоонун доргуччу ааҕыы буолар.

Күрэс Саха Өрөспүүбүлүкэтин бибилэтиэкэлэрин “Бары ааҕабыт” сетевой бырайыак чэрчитинэн ыытыллар.

Хоһоон ааҕыытын түһүлгэтигэр орто сүһүөх оскуола (11-13 саастаах) уонна үрдүкү кылаас (14-17 саастаах) үөрэнээччилэрэ кытыннылар.

Сылын ахсын ыытыллар курэс сыалынан буолар: оҕоҕо улуу суруйааччыларбыт айымньыларыгар тапталы иитии, төрөөбүт тыл сүөгэйин, сүмэтин иҥэрии, сахалыы хомоҕойдук саҥарар дьоҕурун сайыннарыы, камера, дьон иннигэр кыбыстыбакка, толлубакка саҥарарга уһуйуу.

Өрөспүүбүлүкэбит араас улуустарыттан уопсайа 38 хоһоон ааҕыыта киирдэ.

Дьүүллүүр сүбэҕэ үлэлээтилэр:

1. Былатыан Ойуунускай  аатынан Саха академическай театрын артыыһа, Саха Өрөспүүбүлүкэтин үтүөлээх артыыһа Ирина Никифорова;

2. В. П. Ларионов аатынан Майа орто оскуолатын үрдүк категориялаах саха тылын учуутала Ольга Старостина;

3. "Добун" этно- фольклорнай бөлөх төрүттээччитэ, аһымал аахсыйа, кэнсиэр сценариһа, режиссера, тэрийээччитэ, "Саха сирин элбэх оҕолоох дьиэ кэргэнэ" уопсастыбаннай тэрилтэ салайааччыта, поэт Ульяна Скрябина-Умсулҕан Хотун.

Дьүүллүүр сүбэ мунньаҕа алтынньы 27 күнүгэр ыытыллан, кыайыылаахтары быһаарда:

Бастакы бөлөх – орто сүһүөх үөрэнээччилэрэ (11-13 саастаахтар):

1 миэстэ – Сунтаар улууһун В. Г. Акимов аатынан Бүлүүчээн лицей-интернат үөрэнээччитэ Тимофеева Уруйдаана;

2 миэстэ – Томпо улууһун Е. Е. Протопопов аатынан Саһыл орто оскуола үөрэнээччитэ Никитин Руслан;

3 миэстэ – Өймөкөөн улууһун Герой Г. А. Кривошапкин Төрүт орто оскуола үөрэнээччитэ Атласов Миша.

Иккис бөлөх – үрдүкү кылаас үөрэнээччилэрэ (14-17 саастаахтар):

1 миэстэ – Дьокуускай куорат 12 нүөмэрдээх орто оскуола үөрэнээччитэ Семенова Сандаара;

2 миэстэ – Томпо улууһун Е. Е. Протопопов аатынан Саһыл орто оскуола үөрэнээччитэ Уткин Алеша;

3 миэстэ – Дьокуускай куорат 12 нүөмэрдээх орто оскуола үөрэнээччитэ Алексеева Уйгулаана;

3 миэстэ –  Кэбээйи улууһун Н. Х. Дьяконов аатынан Тыайа орто оскуола үөрэнээччитэ Полятинская Света.

Ааҕыыларга кыттыбыт оҕолорбутугар, оҕолору дьарыктаабыт салайааччыларга, төрөппүттэргэ, дьүүллүүр сүбэҕэ Саха  Өрөспүүбүлүкэтин Национальнай бибилэтиэкэтин Оҕо ааҕыытын киинин үлэһиттэрин аатыттан барҕа махталбытын тиэрдэбит!

Айымньылаах үлэҕитигэр ситиһиилэр, кыайыылар кэлэ турдуннар!