- бастакы оҕо суруйааччыта
(14.10.1920 – 11.05.1948)
Калисфена Ивановна Платонова алтынньы 14 күнүгэр 1920 сыллаахха Мэҥэ-Хаҥалас улууһун Наахара нэһилиэгэр төрөөбүтэ. Аҕата Иван Иванович Платонов төрөөбүт нэһилиэгэр бастакы учуутал буоларынан биллэр. 2020 сыллаахха Наахара оскуолатыгар И.И.Платонов аатын иҥэрбиттэрэ. Онтон ийэтэ, Иульяна Дмитриевна Борисова-Платонова аатырбыт атыыһыт, меценат В.С.Никифоров – Манньыаттаах сиэнэ этэ. Ийэтэ эрдэ өлөн, Калисфена икки балтыларын кытта Дьокуускай куоракка улааппыттар. Кэлин, 18 саастааҕар учуутал институтун туйгуннук үөрэнэн бүтэрбитэ, оскуола учууталынан үлэлээбитэ.
Кини кэргэнэ РСФСР уонна Саха АССР наукаларын үтүөлээх диэйэтэлэ, история билимин дуоктара, профессор Георгий Башарин буолар.
Калисфена Ивановна күн сиригэр, баара-суоҕа 28 эрэ сыл олорбута, доруобуйата мөлтөх буолан 1948 сыллаахха күн сириттэн барбыта.
Калисфена Платонова институкка үөрэнэр сылларыгар хоһоон, кэпсээн суруйталыыра, истиэнэ хаһыатыгар тахсыбыт айымньыларын устудьуоннар сөбүлээн ааҕаллар эбит.
Саха литературатыгар оҕо суруйааччыта быһыытынан аҕа дойду улуу сэриитин сылларыгар киирбитэ. Кини бастакы уонна соҕотох кинигэтэ «Харачаан» кэпсээнин 1945 сыллаахха Н. Е. Мординов – Амма-Амма редакциялаһынынан бэчээттэммитэ. Кини айар үлэтин үрдүктүк сыаналаабыта уонна киниэхэ улахан эрэли үөскэппитэ.
1947 сыллаахха Калисфена Платонова ССРС Суруйааччыларын союһун чилиэнигэр кандидат буолар.
Тылбаасчыт быһыытынан эмиэ холонон көрбүтэ. 1948 сыллаахха бэчээттэммит нуучча классикатын тылбаастарын хомуурунньугар кини тылбаастаабыт 4 кэпсээнэ киирбитэ.
Кинигэлэрэ:
- Харачаан https://new.nlrs.ru/to-readers/segments/school/open/35925
- Чехов, Антон Павлович. Кэпсээннэр : [кыра уонна орто саастаах оҕолорго] / К. И. Платонова тылб.https://new.nlrs.ru/to-readers/segments/school/open/36015
Эбии көр:
- Тематическая коллекция в Электронной библиотеке “Первые детские писатели якутской литературы” https://new.nlrs.ru/to-readers/segments/school/collections/1288