Кулун тутар 28 күнүгэр Национальнай библиотека Оҕо арыллар, ааҕар киинигэр Ньурбатааҕы оҕо ускуустубатын оскуолатын 5-с «живопись» кылааһын үөрэнээччитэ Александра Капустина «Чудесный мир красок» бастакы кинигэ-альбомун сүрэхтэниитэ уонна анал быыстапката буолан ааста.

«Чудесный мир красок» альбом «Ааптар оҕолор» бырайыак чэрчитинэн бэчээттэнэн та5ыста. Бырайыак сүрүн сыалынан өрөспүүбүлүкэ бары муннуктарыттан айар дьоҕурдаах оҕолор айымньыларын, үлэлэрин булан, Национальнай библиотека издательскай центрын нөҥүө электроннай кинигэни (хомуурунньугу) таһааттаран дьоҥҥо-сэргэҕэ үлэлэрин билиһиннэрии, киэҥ эйгэҕэ таһаарыы буолар.

Альбомҥа эдэр худуоһунньук ускуустуба оскуолатыгар маҥнайгы кылаастан күн бүгүнүгэр диэри уруһуйдаабыт сүрүн үлэлэрэ киирдилэр. Александра Ньурбатааҕы оҕо ускуустубатын оскуолатыгар маҥнайгы кылаастан туйгуннук үөрэнэр. Кини кыра эрдэҕиттэн араас таһымнаах күрэхтэргэ, быыстапкаларга ситиһиилээхтик кыттар. Саша уһуйааччыта Зинаида Егоровна Ильина этэринэн, кини дириҥ толкуйдаах, үлэһит, туруоруммут сыалын-соругун хайаан да тиһэҕэр диэри тириэрдэр күүстээх санаалаах.

Эдэр худуоһунньук үөрүүлээх күнүн үллэстэ кини чугас дьоно – эбээтэ Мария Андреевна Капустина, аймах-билэ дьоно, Ньурбатааҕы оҕо ускуустубатын оскуолатын дириэктэрэ Илья Николаевич Николаев, уһуйааччыта Зинаида Егоровна Ильина, художественнай салаа сэбиэдиссэйэ Варвара Михайловна Ильина кэлэн эҕэрдэлээн бардылар.