«Таптыыр Сахам тылынан…» өрөспүүбүлүкэтээҕи аахсыйа киэҥ хабааннаахтык ыытылынна
18 февраля 21, 16:00 Издание: «ulusMedia»
Олунньу ый 12 күнүгэр Саха Өрөспүүбүлүкэтин Национальнай бибилэтиэкэтин Оҕо ааҕыытын киинэ Төрөөбүт тыл уонна сурук-бичик күнүгэр аналлаах өрөспүүбүлүкэ оскуолаларын алын уонна орто сүһүөх кылаас үөрэнээччилэригэр «Бары ааҕабыт» өрөспүүбүлүкэ бибилэтиэкэлэрин бырайыак чэрчитинэн үгэскэ кубулуйбут «Таптыыр Сахам тылынан…» өрөспүүбүлүкэтээҕи аахсыйатын быйыл бэһис төгүлүн ыытта.
«Аахсыйа сүрүн сыалынан үөрэнээччилэр саха тылыгар уонна литературатыгар билиилэрин таһымын үрдэтии, уус-ураннык уонна таба суруйар дьоҕурдарын сайыннарыы буолар. Ону таһынан, уус-уран ааҕыыны көҕүлээһин, билиини-кѳрүүнү кэҥэтэр араас матырыйаалы туһана үөрэнии – сахалыы тахсар оҕоҕо аналлаах өрөспүүбүлүкэ, улуус, оскуола хаһыаттарын-сурунаалларын уонна кыраайы үөрэтэр литератураны.
Быйыл өрөспүүбүлүкэ үрдүнэн барыта 6361 оскуола оҕото кытынна. Тэрээһин урут алын сүһүөх кылаас оҕолорун эрэ хабар буоллаҕына, былырыыҥҥыттан орто сүһүөх кылаастары эмиэ хабар буолла. Ол курдук, быйыл хааччахтааһын кэмигэр Интэриниэт ситим нөҥүө биир күҥҥэ, биир кэмҥэ толордулар. Кыттааччылар 9 ыйытыыга хоруйдаан баран, бүтэһик сорудахтарыгар бэриллибит тиэмэ ис хоһоонун, суолтатын арыйан суруйдулар.
Маҥнайгы сүһүөххэ (3 – 4 кылаастар): Хобусарова Вера Үөһээ Бүлүү улууһун П. Н. Тобуруокап аатынан Нам орто оскуолата, 3 «А» кылаас, Степанова Айыллаана Горнай улууһун А. Н. Осипов аатынан Бэрдьигэстээх орто оскуолата, 4 «В» кылаас, Гермогенов Клим Алдан улууһун Томмот санаторнай интернат – оскуолата.
Иккис сүһүөххэ (5 – 6 кылаастар): Семенов Дьулустаан Ньурба улууһун Н. Н. Чусовской аатынан Антоновка орто оскуолата, 6 «А» кылаас, Никонова Арианна Булун улууһун Бороҕон орто оскуолата, Бардеев Саян Хаҥалас улууһун Покровскай куорат 1 нүөмэрдээх орто оскуолата, 5 «А» кылаас.
Үһүс сүһүөххэ (7-8 кылаастар): Сосина Саина Алдан улууһун Томмот санаторнай интернат – оскуолата, Иванов Александр Ньурба улууһун Ньурба куорат М. С. Егоров аатынан 2 нүөмэрдээх орто оскуолата,8 «Б» кылаас, Петрова Айсаана Амма улууһун Л. В. Киренскэй аатынан Амматааҕы лицей, 8 «Б» кылаас. Кыайыылаахтары эҕэрдэлиибит!
Аахсыйаҕа кыттыбыт үөрэнээччилэргэ туоһу сурук ыйыллыбыт электроннай аадырыстарыгар ыытылынна. Саха Өрөспүүбүлүкэтин Национальнай бибилэтиэкэтин Оҕо ааҕыытын киинэ аахсыйаны тэрийсибит улуус, нэһилиэк, оскуола бибилэтиэкэрдэригэр, саха тылын уонна литературатын учууталларыгар махтанар.
Төрөөбүт тыл – норуот барҕа баайа, кэлэр кэскилэ. Төрүт тылбыт симэлийэн сүтэн хаалбатын туһугар кэнчээри ыччаппытын сахалыы өйгө-санааҕа иитиэҕиҥ, саха кутун-сүрүн иҥэриэҕиҥ!» – диэн иһитиннэрдэ Саха Өрөспүүбүлүкэтин Национальнай бибилэтиэкэ Оҕо ааҕыытын киинин Айар тиһиктэри уонна бырайыактары сайыннарар салаа сүрүннүүр бибилэтиэкэрэ
Иванна Бурцева.
Подробнее: https://ulus.media/2021/02/18/taptyyr-saham-tylynan-r-sp-b-l-ketee-i-aahsyja-kie-habaannaahtyk-yytylynna/