“Уран тыл маастара – Н. Е. Мординов – Амма Аччыгыйа”
Олунньу ый 17 күнүгэр Оҕо ааҕар, арыллар киинигэр Ийэ тыл, сурук-бичик күнүнэн, норуодунай суруйааччы Н. Е. Мординов – Амма Аччыгыйа төрөөбүтэ 120 сылыгар аналлаах “Уран тыл маастара” диэн ааттаах ахтыы күнэ буолла.
Көрсүһүүгэ РФ суруналыыстарын союһун чилиэнэ, Саха өрөспүүбүлүкэтин культуратын үтүөлээх үлэһитэ, суруналыыс Васильев Александр Васильевич – Көрдүгэн Чиряевтар ааттарын сүгэр Дьокуускай куораттааҕы национальнай гимназиятын оҕолоругар суруйааччы туһунан кэпсээтэ.
Кини сүдү киһилиин бииргэ үлэлээн ааспыт кэрэ кэмнэрин, олоҕун уонна айар үлэтин, киһи быһыытынан олус сэмэйин уйаҕастык ахтан, элбэх хаартыскалары, кинигэлэри көрдөрдө. Кини саха оҕото элбэҕи ааҕан, билиитэ хаҥыырын туһугар отучча сыл оҕоҕо аналлаах хаһыакка үлэлээбитэ уонна бу сылларын олоҕун саамай табыллыбыт кэминэн ааттыыра. Бары да Амма Аччыгыйын кинигэлэринэн улааппыт дьоммут. «Сааскы кэм» саха олоҕун бүтүннүү арыйан көрдөрөр арамаан буолар. Билиҥҥэ диэри дьон сэҥээрэр, кэрэхсиир, бу айымньынан испэктээк туруоруллар, киинэ уһуллар.
Оттон Амма Аччыгыйа “Тоҕус төгүл тоҕо?” кэпсээнэ оҕо өйүгэр санаатыгар дириҥник иҥэн хаалар. Оҕо болҕомтотун тардан, айымньыны сатаан ааҕарга, албыны саралыыр, иитэр-үөрэтэр,сиэрдээх буоларга үөрэтэр. Оҕолорго ыйытыктары биэрэн тургутан көрдүбүт. Маны сэргэ Амма Аччыгыйа тылбаастаабыт кинигэлэрин билистилэр, быһа тардан аахтылар. “Саха муударай сээркээн сэһэнньитэ” – айар үлэтигэр анаммыт кинигэ быыстапкатын көрдүлэр.
Түмүккэ, “Бэлэм буоллар” бэлэмнээбит, Дмитрий Мухин эскииһинэн Юрий Троев оҥорбут, Амма Аччыгыйын 120 сылыгар анаммыт мэтээли Ефремова Людмила Васильевнаҕа суруналыыс Васильев А.В.-Көрдүгэн туттарда. Онон бүгүн сүрдээх истиҥ, сылаас эйгэлээх, элбэҕи биллэрэр тэрээһин буолла.
