Быйыл, саха литэрэтиирэтэ төрүттэммитэ 125 сылыгар, төрөөбүт тыл уонна сурук-бичик күнэ ураты суолталаах. Декада чэрчитинэн библиотекаҕа да оскуолаларга да үгүс тэрээһиннэр аастылар.
Олунньу 13 күнүттэн саҕалаан «Ийэ тыл этигэн кэрэтэ» тыл оонньуута ыытылынна. Оскуола үөрэнээччилэригэр тыл кэрэтин, ийэ тылбыт кэрэхсэннин диэн саха тылын чинчийээччилэрин, суруйааччылары, тумус туттар дьоммут туһунан кэпсээтибит, иһитиннэрдибит.
Оҕолор сахалыы сайаҕастык саҥарар, иэйиилэрин истиҥник этинэр буолбуттара сүргэни көтөҕөр, үөрдэр. Оонньуу ыйытыктарыгар кэбэҕэстик хоруйдууллара ийэ тылбыт кэнэҕэскилээҕин туоһулуур. Сомоҕо домохтору туттан, күннээҕи туттар тылбытыгар киллэрдэхпитинэ, тылбытын байытыа этибит.
Бу күннэргэ дьоһуннаах кэпсэтиилэргэ, оонньууга 151 Дьокуускай куорат оскуолаларын үөрэнээччилэрэ кытыннылар.