Васильева Клавдия Ивановна алтынньы 11 күнүгэр 1950 сыллаахха Уус-Алдан улууһун Бээрийэ нэһилиэгэр төрөөбүтэ.  Үрдүк филологическай үөрэхтээх (Саха тылын уонна литературатын учуутала).  1981 сылтан оҕо садын иитээччитэ. Билигин Уус-Алдан улууһун Мындаабатыгар «Кэскил» оҕо саадыгар үлэлиир. Методист – воспитатель быһыытынан сүрүн үлэтэ “5-6 саастаах оҕолор тылларын сайыннарыыга методическай пособие” буолар. Ол курдук, үлэтин сүрүн хайысхаларынан: тыл сайдыытыгар методическай көмө матырыйааллары оҥоруу, «Народное образование» сурунаалга, «Кэскил», «Учуутал аргыһа», «Саха сирэ» хаһыаттарга оскуола иннинээҕи саастаах оҕолору иитии уонна үөрэтии боппуруостарыгар опыт атастаһыыта буолар. «Түннүк», «Кырачаан», «Күнчээн», «Туллукчаан» телевидение, араадьыйа биэриилэригэр иитиллээччилэрэ элбэхтик кыттыбыттара, бэйэтэ оҕо тылын сайыннарыыга республикатааҕы семинардарга кыттыбыта. 

Оҕо тыл-өс, эт-сиин өттүнэн сахалыы сайдарыгар анаан, Клавдия Ивановна кинигэлэри таһааттарбыта. 2003 сылтан саҕалаан оҕолорго аналлаах айымньыларын суруйталаан барбыта. “Көрдөөх остуоруйалар” хомуурунньугар киирбит “Куобах хаппыыстата” остуоруйата, Россия үрдүнэн ыытыллыбыт куонкурус кыайыылааҕын быһыытынан “Дрофа” издательскай киин таһаарбыт “Россия норуоттарын остуоруйалара” (“Сказки народов России”) кинигэҕэ киирбитэ.

Клавдия Васильева өр сыллаах сыралаах үлэтэ үрдүктүк сыаналаммыта.  Кини «РФ үөрэҕириитин туйгуна», «СР учууталларын учуутала» бэлиэнэн наҕараадаламмыта.  Кини РФ Журналистарын союһун чилиэнэ, «Азия оҕолоро» норуоттар икки ардыларынааҕы оҕо фондатын 2005 сыллаахха лауреата, «Татыйык» республикатааҕы оҕолорго аналлаах хоһоон уонна ырыа конкурсун номинация хаһаайына. 2016 с. Оҕо литературатын уобалаһыгар Н. Е. Мординов – Амма Аччыгыйа аатынан СӨ Ил Дарханын бириэмийэтин ылбыта.

Айымньылара:

1. Оскуола иннинээҕи саастаах оҕолорго тыл оонньуулара https://new.nlrs.ru/to-readers/segments/school/open/14600
2. Көрдөөх остуоруйалар / С. Старостина ойуулара. –  Дьокуускай :  Бичик, 2010. –  32 с.  : ил. –  (Остуоруйа эйгэтэ).
3. Оотой-тоотой  :  хоһооннор  /  С.  Старостина-Сунхалырова  ойуулара.  –  Дьокуускай  :  Бичик, 2007. –  46 с.  :  ил. –  (Кырачааннарга).
4. Тыа  саҕатыгар :  остуоруйалар / А.  В. Алексеев ойуулара. –  Дьокуускай  : СахаКнигаТорг, 2015. –  32 с.  : ил.
5. Куобах хаппыыстата : остуоруйа // Бэлэм буол+. –  2016. –  Балаган ыйын 15 к .- С .  19.
6. Дьикти түүл  : остуоруйа // Бэлэм буол+. –  2016. –  Балаган ыйын 22 к. -С.  19.
7. Миша уонна Маша туһунан  остуоруйа  :  остуоруйа //  Бэлэм  буол+.  –  2016. –  Балаган ыйын 29 к. –  С.  19